احزن حتى تفرح ..

by **3moor** 24/4/2010, 9:52 pm

السلام عليكم ورحمة الله وبركاته ..

ازيكم يا شباب ..

كل سنه وانتم طيبين .. اكيد كلمه حلوه لما حد يفتكرك بيها فى العيد ..

تخيل نفسك صاحى يوم العيد وانت ف قمة السعاده وتلاقى رساله ( كل سنه وانت طيب ) ..

اكيد هتفرح .. مش هقولك انك هتطير م الفرح لان دى حاجه انت اساسا مستنيها ان حد يعيّد عليك ..

لكن المشكله بقى لما تقوم ومش تلاقيها .. ومتلاقيش حد خالص يعيّد عليك .. ولا كإن فيه عيد ..

ساعتها هتحزن حزن غير عادى .. عارف ليه ؟؟ لإنك مستنى حد يعيّد عليك ومحصلش ..

ساعتها نفسك بتتكسر .. ويبقى العيد بدل ما هو وقت للفرحه .. بقى عباره عن كام يوم من الحزن وكسرة النفس ..

لما تبقى فى وقت فرحه ويحصل حاجه تكسر نفسك بتكسرك اوى .. لانها بتنزلك من سابع سما لسابع ارض ..

والعكس .. تخيل ان انت فى وقت قمه فى الحزن وحصلت حاجه تفرحك .. هتفرح اوى .. هتطير من الفرحه ..

مع ان نفس الحاجه لو كانت حصلت وانت فرحان مكنتش هتحس بيها اوى كده ..

لكن هيا الدنيا كده .. متحسش بالفرحه اوى غير لما تحزن ..

ومتحسش بالحزن اوى غير لما ييجى الحزن فى وقت انت محتاج حد يفرحك فيه ..

احزن حتى تفرح .. ولا تبالغ فى الفرحه حتى لا يقتلك الحزن ..